മുഖരേഖ

 കടങ്കവിത /സത്യം മാത്രമേ പറയാവൂ.

❂❂❂❂❂❂❂❂❂❂❂❂❂❂❂❂❂❂❂❂

തല കുനിച്ചു കടന്നു പോയിട്ട്

ഇലയനങ്ങാതെ തിരിഞ്ഞു നോക്കുമ്പോൾ

അതിലൊരു കവിതയുണ്ട്.

ഇഷ്ടമെന്ന് മൃദുവായുരയ്ക്കവേ

രൂക്ഷമായി നോക്കി മറഞ്ഞിട്ട്

ആരും കാണാതെ

മുഖം പൊത്തി ചിരിയ്ക്കുമ്പോൾ

അതിലൊരു കവിതയുണ്ട്.

ഉറക്കമുണർന്നു അലസമായി കിടക്കുമ്പോൾ

രാത്രി കണ്ട കിനാവുകൾ

ചുണ്ടിലൊരു പൂ വിടർത്തുന്നുവെങ്കിൽ

അതിലുമൊരു കവിതയുണ്ട്

കാണുമ്പോഴൊക്കെയും കവിളിൽ മൈലാഞ്ചിച്ചോപ്പ് പടരുന്നുവെങ്കിൽ,

നട്ടുച്ചയ്ക്കും കരിമഷിക്കണ്ണുകളിൽ

മെഴുതിരി നാളം തെളിയുന്നുവെങ്കിൽ,

ആൾക്കൂട്ടത്തിലെപ്പോഴും കണ്ണുകൾ

അറിയാതൊരാളെ തിരയുന്നുവെങ്കിൽ....

അതിലൊക്കെയുണ്ടാകും ഒരു സുന്ദര കവിത...

ഓർത്തു നോക്കൂ

ഇതിലേതെങ്കിലുമൊന്ന്

നിങ്ങൾക്കുണ്ടെങ്കിൽ

ഉറപ്പായും നിങ്ങളിലുമുണ്ടാകും

ഒരു കടങ്കവിത.