ആര് വാങ്ങുമീ അനഘ സൂനത്തിൻ
അതി മനോഹര മാല്യങ്ങൾ
അരുമ വാടിയിൽ അലർ വിടർന്നൊരു
അനിതരാനന്ദ കാന്തികൾ
വിടർന്നു സൗരഭം അകലും മുൻപേയായ്
അടർത്തി മാറ്റിയ താരകൾ
അതി വിശുദ്ധിയാലൊറ്റ നൂലിലായ്
കോർത്തെടുത്ത പ്രസൂനങ്ങൾ.
ഒന്നു വാങ്ങുകിൽ മറ്റൊന്നു വേറെയും
ഇന്നു മാത്രമായ് നൽകിടാം
നേരമേറെയായ് നിഴലു കുറുകയായ്
അർക്കനുച്ചിയിൽ വിളങ്ങയായ്
വാടിടും മുൻപേ ആര് വാങ്ങുമീ
മോടിയിൽ മേവും പൂക്കളെ
സ്വച്ഛ ശോഭയിൽ പുഞ്ചിരിച്ചിടും
സൗമ്യ വദന സുഭഗങ്ങളെ
കാത്തിരിപ്പുണ്ട് എന്നെയും നോക്കി
കുടിയിൽ വേറെയും ജന്മങ്ങൾ
പൂമാല വിറ്റു ഞാൻ വാങ്ങിയേകുന്ന
പ്രാശമേറ്റം മോഹിപ്പവർ
ആർക്കു വേണമീ മധുര സ്മേരത്തിൻ
മനസ്സുലക്കുമീ മുദ്രകൾ.
ആര് വാങ്ങുമീ ജീവിതാനന്ദ
ചാരു സുന്ദര മാലികൾ....!!
No comments:
Post a Comment